cianciana ridenti de’ nostri cuntradi, accetta ‘stu ciuri ca t’offru stasira
cu tuttu l’amuri.
Maria chi turmenti ca aiu passatu e tu no’ sapevi…
Passavi arrirennu fragranti di suli: d’aranci sapevi e di mennuli ruci appena cugghiuti.
Tinuzza mia bedda, ascuta ‘a me vuci.
S’a notti viveva ‘a passava vigghianti, di iornu durmeva, additta, chi sai!
I schigghi sinteva de’ piscatori ca ievunu a mari: Paulu, Petru, spicciamuni,
è tardu.
I camii passavunu, carretti, carriola. ‘A genti travagghia ma ‘a notti ha durmutu.
Iù inveci, susennumi pareva cascatu da’n grattacielu. Intantu chi fazzu?
diceva tra mia. Ciù dicu? Non pozzu. Iardini idda avi e iù? Sulamenti ‘n cori amurusu.
Ci’abbasta? Pi nenti….
‘A genti sfuieva e ‘u to palazzoni vardava infelici e pazzu d’amuri.
‘Na sira tu dissi, ti dissi precisu: si bedda Tinuzza, si ‘a megghiu reggina, iù beni
ti vogghiu.
‘U sacciu, ‘a ricchezza è cosa ca cunta ma, vidi, è ch’iossai de’ ricchizzi do’ munnu
l’amuri pi’ tia.
Di sì arrispunnisti. E ora affacciatu, Tinuzza ti pensu. ‘A luci do’ mari ‘ddassutta luntana
mi fa cumpagnia.
Stanotte ti sonnu, e quannu na’ l’alba ‘a vuci di chiddi ca vanu a piscari si leva schigghenti,
mi susu cuntentu.
‘U suli talìu, ca pari ‘a to’ facci. Mi lavu, mi vestu e vaiu a passiari.
Autore: lorenzo.rm
Contributo di , 27 agosto 2009 08:19.